Äs Drügeschtirn

I sym erschte Roman schrybt dr Ueli Seiler-Hugova über zwo Froue u ä Maa, wo ungerem Sigriswilergrat im Rütti i re Gsamtschueu zäme ungerrichte. Aui drü sy Künschtler: ä Musikerin, ä Dichterin u ä Kunschtmaler. Si läbe aus WG i däm Schuehuus. Dr Outor het's wungergno, wi das überhoupt geit. Äs entsteit ä Liebi z dritt. Da druus macht dr Ueli Seiler-Hugova ä wunderschöni Utopie. Ds Pädagogisch-Didaktische wird exemplarisch dargsteut. Dr Outor versuecht, d Liebi aus oberschts Prinzip z zeige. Är isch säuber aus Sohn vom Lehrer zwüsche 1946 u 1953 im Rütti ufgwachse. Und so isch mit däm Roman ou ä Hommage a dä Ort entstange.